Дэвайсы маладосці ад фаварытак Лукашэнкі

Мы даведаліся, што Марыя Васілевіч і Алена Казак пастаўляюць абсталяванне для медыцынскіх клінік і б’юты-салонаў.

Нядаўна мы расказалі, што экс-дэпутатка Марыя Васілевіч і асабістая доктарка-анестэзіёлаг кіраўніка Беларусі Алена Казак зарэгістравалі фірму «Амалем».

Мяркуючы па звестках свежастворанага сайта «Амалема», кампанія з’яўляецца афіцыйным прадстаўніком трох вядучых сусветных вытворцаў медычнага абсталявання і вырабаў медычнага прызначэння для эстэтычнай медыцыны, касметалогіі, дэрматалогіі і гінекалогіі.

На сённяшні дзень Васілевіч і Казак прапаноўваюць пакупнікам прадукцыю з Расіі, Паўднёвай Карэі і Іспаніі, а таксама вучаць персанал працаваць на гэтых апаратах.

Скрыншот сайта кампаніі «Амалем». Крыніца: amalem.by

Алена Казак не пачаткоўка ў б’юты-сферы. «Люстэрка» пісала, што ў 2024 годзе яна стала аднаасобнай уладальніцай салона Antiage Сlinic, які прапаноўвае кліентам амаладжальныя і іншыя касметалагічныя і дэрматалагічныя працэдуры.

Злева направа: Алена Казак, Наталля Эйсмант на вечарынцы Antiage Clinic. Крыніца: Інстаграм

«Бюро» стала вядома, што ва ўласным салоне Казак хутка з’явіцца апарат Estetica LightCare Pro – акурат такі самы дэвайс яна прадае з Марыя Васілевіч праз «Амалем».

Амбасадарка Antiage Сlinic – кіраўніца асацыяцыі рэстаратараў Беларусі і спадкаемніца рэстараннага холдынга Golden Project Наталля Садоўская.

Наталля Садоўская на адкрыцці Antiage Clinic. Крыніца: Інстаграм Наталлі Садоўскай

У 2020 годзе яна была запрошанай госцяй на таемную інаўгурацыю Аляксандра Лукашэнкі.

Раней Antiage Сlinic называлася «Айрыс» і ёй валодалі асабістая доктарка Лукашэнкі – Святлана Канашэнка, яе сястра Наталля Кізік і хакеіст Павел Белы.