Улады засакрэцілі фінансавую справаздачнасць медыяхолдынга нявесткі Лукашэнкі
«Бюро» высветліла, што з 2025 года фінансавыя паказчыкі медыяхолдынга, якім кіруе нявестка Лукашэнкі, сталі «дзяржаўнай падатковай таямніцай». Такую пастанову выдаў Савет міністраў Беларусі.
Ганна Лукашэнка-Сялук. Крыніца: belta.by
Пад грыфам «сакрэтна» аказаліся амаль усе актывы, звязаныя з Ганнай Лукашэнкай, якая больш вядомая як аўтарка тэкстаў песень Ганна Сялук: «Музычная медыякампанія» – медыяпрадакшэн, «Музычная частата» – акумулюе дзейнасць трох радыёстанцый, і нават нядаўна створанае рэкламнае агенцтва «Крэатыўны код».
Апошні год «Бюро» адзначае тэндэнцыю: сям’я Лукашэнкі актыўна хавае структурныя і фінансавыя дадзеныя кампаній, якія звязаныя з імі асабіста і іх блізкімі сябрамі. Раней такім жа парадкам была засакрэчаная ўся фінансавая справаздачнасць фірм пад кантролем братоў Лукашэнкаў – Віктара і Дзмітрыя. Таксама нядаўна мы паведамлялі, што «дзяржтаямніцай» стала і бухгалтарская справаздачнасць рыбнага холдынга Людмілы Няронскай, бізнэс-інтарэсы якой лабіруе клан Віктара Лукашэнкі.
«Бюро» накіравала запыты ў Савет міністраў РБ, Міністэрства па падатках і зборах РБ і Міністэрства юстыцыі РБ. Мы папрасілі даць тлумачэнні: чаму інфармацыя пра расходы і даходы прыватных фірм стала «дзяржаўнай падатковай таямніцай».
Мы атрымалі адказ з Міністэрства па падатках і зборах. У ведамстве паведамілі, што «раскрыццё запытанай інфармацыі заканадаўствам не прадугледжана».
Адзіная фірма з медыяхолдынга Сялук, якая не трапіла пад грыф «сакрэтна», – «АНСЛ прадакшн». Яе бенефіцыярны ўладальнік – Андрэй Урублеўскі – топ-менеджар мужа Ганны Лукашэнкі-Сялук – Дзмітрыя Лукашэнкі. Гэтая фірма трымае долі ў «Музычнай медыякампаніі» і «Крэатыўным кодзе». Па выніках 2025 года чысты прыбытак «АНСЛ прадакшн» склаў 266 тысяч беларускіх рублёў.
На чым канкрэтна зарабляе «АНСЛ прадакшн», дакладна невядома. Аднак з 2023 па 2025 гады фірма падавала дэкларацыі па падатку на нерухомасць арганізацый. Гэта сведчыць пра тое, што на балансе кампаніі маецца нерухомасць, якую «АНСЛ прадакшн» можа здаваць у арэнду.